Taciti Annalium Liber Primus/XXII
XXII
recensereFlagrantior inde vīs, plūrēs sēditiōnī ducēs. et Vibulēnus quīdam gregārius mīles, ante tribūnal Blaesī adlevātus circumstantium umerīs, apud turbātōs et quid parāret intentōs[1] ‘vōs quidem’ inquit ‘hīs innocentibus et miserrimīs[2] lūcem et spīritum reddidistis: sed quis frātrī meō vītam, quis frātrem mihi reddit? quem missum ad vōs ā Germānicō exercitū dē commūnibus commodīs nocte proximā iugulāvit per gladiātōrēs suōs[3], quōs in exitium mīlitum habet atque armat[4]. respondē, Blaese, ubi cadāver[5] abiēcerīs: nē hostēs quidem sepultūrā invident[6]. cum ōsculīs, cum lacrimīs[7] dolōrem meum implēverō, mē quoque trucīdārī iubē, dum interfectōs[8] nūllum ob scelus, sed quia ūtilitātī legiōnum cōnsulēbāmus, hī[9] sepeliant.’
Recitātiō
recensereRecitātiō tarda ad faciliōrem perceptiōnem apta.
Adnotātiōnēs
recensere- ↑ = intentē observantēs quid parāret.
- ↑ hīs ... miserrimīs: iīs, quōs Blaesus carcere claudī iusserat.
- ↑ Blaesus iussisset gladiātōrēs suōs, ut frātrem iugulārent.
- ↑ Blaesus armāvisset gladiātōrēs suōs eā causā, ut mīlitēs interficerent.
- ↑ cadāver -eris n: corpus mortuum.
- ↑ invideō -vīdī -vīsum 2 alicui in aliquā rē vel (ut hīc) aliquā rē vel interdum (apud poētās) alicuius rei.
- ↑ = cum implēverō dolōrem ōsculīs lacrimīsque. (cum ... cum: coniūnctiōnēs temporālēs. ōsculīs ... lacrimīs: ablātīvī īnstrumentālēs.)
- ↑ interfectōs: mē (Vibulēnum) et frātrum meum.
- ↑ hī: circumstantēs mīlitēs (quōs nūper adlocūtus erat.)